КУЛА – На 45. Медзинародней вистави ручних роботох и колекционарства (МИРК),
хтора од 3. по 9. април отримана у кулскей ОШ „Петефи бриґада”, за свойо роботи наградзени и членїци Здруженя женох „Идея” з Кули и „Байка” з Руского Керестура.
Зоз Здуженя „Идея” уровень-награду за винїмкови квалитет достали Паулина Такач за писанки, Серафина Бики за геклану роботу и Мелания Арваї за руски вишивани ручнїк.
Попри спомнутих, жени з „Идеї” достали и 7 перши, 7 други и єдну трецу награду, а медзи нїма и Рускинї Ирина Кочиш, котра достала два перши награди за ткану и вишивану роботу, а Ана Гарди єдну першу и єдну другу награду, тиж за таки роботи. За участвованє з вишиванима и тканима ручнїками Мария Сивч достала диплому.
Здруженє женох „Байка” достало диплому за участвованє на вистави, дзе викладало ткани, вишивани и геклани партки, а наградзени и даскельо поєдинєчни роботи.
Славица Катона достала уровень-награду за винїмкови квалитет за ткану роботу, з першу награду наградзени вишивани парток Мариї Малацко, геклани парток Мариї Тиркайла и вишивани парток Гелени Такач. За виставу спомнути роботи обезпечели членїци „Байки” Амалия Гарди и Ксения Йованович.
На 45. Медзинародней вистави ручних роботох и колекционарства (МИРК) були виложени найрижнороднєйши експонати з прейґ 30 жемох швета, а викладали коло 70 рижни здруженя и секциї.
Виставу заварли и подзелєли дипломи предсидатель и координатор МИРК Иштван и Йохана Бада з Нового Саду, орґанизатор вистави бул Союз здруженьох колекционарох Сербиї, а технїчни орґанизатор Мадярски културни центер „Непкер” з Кули.
