КУЛА – За нєшка, 23. новембра, наявени други протест бувших роботнїкох препаднутих фабрикох у Кули – наявене на сайту Наше место. Як и перши, отримани 9. новембра, протест орґанизую Дюрдїна Маравич, Зоран Влашки и Олена Папуґа, односно Организацини одбор роботнїцкого нєзадовольства.
Гоч державни секретар Неґован Станкович одвитовал на посланїцки питаня народней посланїци Олени Папуґа хтори ше одношели на проблеми бувших роботнїкох препаднутих кулских фабрикох, насампредз кулскей Штофарнї, роботнїки тримаю же їх вимоги нє вислухани, так ше нєшка на 10 годзин у Кули орґанизує ище єден протест.
Роботнїки вимагаю же би шицки бувши заняти у АД „Кулски штофи” були облапени зоз социялну програму понеже Штофарня 97 одсто у власносци держави, як и же би шицки, а нє лєм 82 роботнїки, достали средства з Фонду солидарносци.
Роботнїком Штофарнї шлїдза и 12 минималци и одпремнїна по Закону о предликвидациї, а интересує их и цо з маєтком Штофарнї – гвари ше у вимогох нєзадовольних роботнїкох хтори 9. новембра придати Предсидательови Општини Кула, предсидательви Влади РС, министрови за роботу, социялни и борецки питаня, предсидательки Одбору за привреду Народней скупштини, предсидательови Покраїнскей влади и покраїнскому секретарови за привреду, обезпечованє роботи и ровноправносц полох.