Нє шицки лїкарки буду пензионовани

автор маф
787 Опатрене

СЕРБИЯ – Министерство здравя позавчером сообщело же нє точни дзепоєдни медийски написи же 3 500 лїкарки специялистки 12. октобра пойду до пензиї, алє то число тих котри теди сполня предписани условия за старосну пензию, цо як наведзене, нє значи и же шицки буду пензионовани.

Применьованє Закона о одредзованю максималного числа занятих у явним секторе почнє 12. октобра, та лїкарки котри по теди виполня условиє за пензионованє (прейґ 60 роки живота) годни и пойсц до пензиї, кед то нє загрожи функционованє здравственей системи.

Як далєй толкую з Министерства, з лїкарками за чию роботу и далєй єст потреби годно направиц спорозуменє о предлужованє роботного одношеня.

На другим боку, шицки котри виполня условиє за пензионованє, а за їх роботу нєт потреби – буду пензионовани. Рационализация ше насампредз одноши на нємедицинских роботнїкох, котрих, як поведзене, по европских стандардох єст вецей як би требало.

О наяви о пензионованю 3 500 лїкаркох оглашела ше и Лїкарска комора Сербиї (ЛКС), хтора ше спроцивела нєселективному примушуюцому пензионованю їх колеґиньох, спозорююци же у дзепоєдних секторох здравственей системи уж хибя висококвалификовани фаховци.

Прето Комора тиж предложела подобне ришенє, тє. селективи приступ и же би пензионованє лїкаркох було окончене поступнє, у наступних шейсц мешацох, або за рок, а почитуюци нєобходни процес роботи у здравствених установох.

Директорка Лїкарскей комори Весна Йованович вчера виявела же у Министерстве здравя маю порозуменя и же ше винайдзе способи же би, покля нє буду обезпечени кадри котри их годни заменїц, лїкарки з условийом за пензию предлужа робиц.

ПОВЯЗАНИ ТЕКСТИ