БЕОҐРАД – З нагоди написох медийох о тим же гакере з информацийней системи Министерства нукашнїх дїлох превжали базу податкох у хторей ше находза єдинствени матични числа гражданох, числа телефонох, адреси и шифри за приступ мейлом, та их поставели на интернет, з тей институциї гварели же то нє правда и же їх информацийна система нє загрожена.
– Тота система цалком оддзелєна од интернету и физично є изолована од гоч якого уплїву з ґлобаней мрежи. Можу єй приступиц лєм полицайски службенїки з нукашнєй мрежи – наведзене у сообщеню началнїка Сектору за аналитику, телекомуникацийни и информацийни технолоґиї Министерства нукашнїх дїлох (МУП) Слободана Недельковича.
Же то дезинформация з цильом твореня панїки при гражданох гутори и факт же МУП нє водзи евиднцию о числох телефонох гражданох, анї о їх шифрох за приступ мейлом.
– Тоти евиденциї хтори хаснує МУП строго дефиновани зоз законскима реґулативами, а їх змист и черанка з другима орґанами державней управи и їх хаснованє надпатра Поверенїк за информациї од явного значеня и защиту податкох – сообщел Неделькович.