ДЮРДЬОВ – Всоботу, 9. януара, опрез спомин-плочи жертвом Рациї з Дюрдьова у Другей шветовей войни, дюрдьовски священїки – грекокатолїцки о. Йоаким Холошняй и православни о. Петар Дюкич – отримали парастос.
Предсидателька Совиту Месней заєднїци Дюрдьов Леона Виславски здогадла на збуваня з 1942. року, кед и Дюрдьовчанє були жертви окупаторского фашистичного терору, а школяре з дюрдьовскей ОШ пречитали даскелї писнї хтори инспировани з тоту подїю. Єдна з нїх була и писня Миколи М. Кочиша „Бешеда зоз Тису”, хтора пречитана по руски и по сербски.
Венєц на плочу поставели Леона Виславски и предсидатель Месного одбору Здруженя борцох НОВ Адил Смаилович.
На парастосу присуствовали гражданє, члени општинских и месних институцийох и здруженьох, а потим у Школи бул пригодни коктел.