НОВИ САД – Войводянски секретарият за польопривреду, водопривреду и лєсарство поднєсол потупово прияви процив трох клальньох хтори повязани на колектор з хторого до Дунаю на новосадским кею уж даскельо раз вичурела червена чечносц.
Покраїнски секретар за польопривреду, водопривреду и лєсарство Бранислав Боґарошки за Танюґ потолковал же компетентна инспекция окончела контролу у индустрийох меса Матиєвич, Неопланта и Трифунович и утвредзела же єст нєдостатки, та прето 24. авґуста поднєшени потупово прияви за привредни преступ.
Боґарошки у вияви Танюґу гварел и же тим подприємством наложене же би одклонєли нєдостатки, надпоминаюци же инґеренциї у тей обласци подзелєни на покраїнски секретарияти – за польопривреду, водопривреду и лєсарство и на секретарият за защиту животного штредку.
-Гоч одвичательносц пренєшена на покраїнски секретарияти, сиґурно же ю ма и новосадски „Водовод и канализация” хтори предписує условия за приключованє на колектор та так поставя и одредзени стандарди на основу хторих и видава дозволи – виявел Боґарошки.
Гражданє на новосадским кею уж даскельо раз приявйовали же зоз колектора до рики чури червена чечносц.