Оддзелєнє за комунални и будовательни роботи Општини Вербас тих дньох почало порядно отримовац парки за дзеци, односно заменьованя очкодованих часцох шицких 24 паркох кельо єст у општини.
Роботи ше одноша на оправянє и заменьованє поламаних, або витрошених часцох бавискох и реквизитох, та и поставяня нових. То подрозумює шицки потребни шлосерски, заварйовацки и тишлїрски роботи, як и антикорозийне фарбенє постояцого, такволаного мобилияра – гомбалкох, спущовалкох, колїмбачкох…
У сообщеню Оддзелєнє за комунални будовательни роботи општини Вербас стої же док буду тирвац роботи, парки буду заварти, и модлї ше родичох и дзеци же би почитовали безпечносци мири и нє уходзели у тим чаше до парку.
– Нови парки за дзеци буду закончени до конца септембра. Средства зме обезпечели зоз донацийох. Идуцого тижня буду поставени табли информованя о защити и чуваню шицких бавилїщох о котрих ше стара општина Вербас. Зоз меснима заєднїцами засадзиме траву и древка до самих паркох, зоз чим достаню нови випатрунок, а наздаваме ше же на нїх будзе мерковац и чувац – гвари Иґор Милович, руководитель Оддзелєня за комунални и будовательни роботи. Тото Оддзелєнє окончує надпатрунок над тима роботами, же би шицки риквизити були и безпечни, и же би ше нє случели нєпредвидзени нємили ситуациї.
По Миловичових словох, Општина Вербас прейґ донаторох обезпечела средства за вибудов двох нових паркох у Бачким Добрим Полю и Савиним Селу. Вяри уж закончени нови парки за дзеци у Змаєве.