ВЕРБАС/КОЦУР – Предшколска установа „Бошко Буха” нєшка, 1 септембра, предлужує воспитно-образовну роботу у своїх обєктох у општини Вербас, почитуюци мири и препоруки Министерства просвити, науки и технолоґийного розвою. Єден з тих обєктох и „Герлїчка” у Коцуре.
Пре реконструкцию штирох обєктох у Вербаше, того школского року придзе до вименки у роботи тей Предшколскей установи. Найобсяжнєйши роботи окончує ше на централним обєкту „Бубица”, дзе планована замена комплетней изолациї, облакох и дзверох, та тот обєкт виселєни и у нїм ше настава нє будзе одвивац. Роботи буду окончовани и на обєктох „Ливадица”,„Полетарац” и „Вила”.
Того року до Предшколскей установи у општини Вербас буду ходзиц 1.340 дзеци. Новосц же роботни час дзецинских заградкох предлужени за годзину, та ше активносци у шицких обєктох тей Установи убудуце буду одвивац през роботни днї рано од 5,30 по 16,30 годзин пополадню.