РУСКИ КЕРЕСТУР – Мултикултуралносц у Войводини то тема хтору обрабяю волонтере у другим тижню Медзинародного волонтерского кампу у Руским Керестуре. За пейц днї буду представени пейц народи – Руснаци, Словаци, Мадяре, Українци и Серби, а перши дзень народне облєчиво и традийцийни єдла представели домашнї Кампу – Руснаци.
Представителє Волонтерского центру Войводини, партнера Туристичному здруженю Руски Керестур у реализациї Кампу, перше отримали презентацию о Руским Керестуре и Руснацох у Сербиї, а потим ше госци могли облєчиц до нашого народного облєчива. Руски шпиванки волонтером шпивали два шпивачки з Дзивоцкей шпивацкей ґрупи Дому култури Руски Керестур, а на даскельо заводи ше и затанцовало чардаш, цо за єден тидзень Кампу шицки учашнїки добре звладали.
У другей часци Волонтерского кампу участвує и Любица Няради, котра орґанизує и помага младим у пририхтованю єдлох, та вчера волонтере правелии капущанїки, белюш, колбасу з кромплями на тепшички, потим колачи брескинї, та шалати.
Конїцки клуб „Русин” порядни сотруднїк Волонтеркого кампу, та и того року його члени Яким Чижмар, Желько Папуґа и Ґабор Медєши волонтерох вчера на кочох повожели по валалє, а понеже того року знова у Кампу и гармоникаш Иван Лїкар з Миклошевцох, а перши раз и Матей Бурчак з Вуковару котри грає на тамбурки, цали дзень препровадзени з руску музику и шпиванку.
Тоту мултинационалну роботню вчера зазначела и Радио-телевизия Сербиї, односно екипа емисиї „Граждан”, хтора пошвецена националним меншином и заєднїцом у Сербиї.