НОВИ САД – Од 3. октобра на Радиo Новим Садзe (РНС) РТВ почала нова жимска шема, з хтору пременєни даєдни термини емитованя Програми на руским язику. Знова почина емитованє емисийох хтори нє ишли влєце, а буду емитовани и емисиї з нєзависней продукциї. Емисиї по руски на РНС ше емитує на Трецей програми, на 100 меґагерци (MHz), односно 92 MHz за подруче Зомбору и 107,1 MHz за подруче Вершцу.
Главни информативни емисиї – „Ранши дньовнїк” и „Радио новини” – и далєй у своїх узвичаєних терминох – на 7,30, односно на 14 годзин, а од пондзелку по пияток кажде рано на 6 годзин новинаре РНС пририхтую и емитую Раншу програму. Контакт-емисия „По наших местох“ знова будзе емитована у старим терминє, кажди пондзелок на 13 годзин, а пред ню, як и дотераз, з нєзависней продукциї „Спорт и рекреация, односно музична емисия „Зоз нашого жридла” на 12,10 годзин.
Вовторок на 12,10 почна музична емисия „Мелодиї Ровнїни”, на 12,30 г. емисия о Руснацох у швеце „Ту и там“, после нєй на 13 г. „Аґробизнис“, як и емисия о уплїву евроинтеґрацийох на руску заєднїцу „Европски интеґрациї“, на 13,30 годзин.
Емисия „Дом и фамилия“ будзе емитована кажду стреду у новим терминє – на 12,10 г., а после нєй емисия за пензионерох „Златна єшень живота“ (на 13 г.). З нєзависней продукциї стреду на 13,30 г. будзе емисия о историї и народних обичайох „Одняте од забуца“.
Штварток на 12,10 г. РНС емитує музичну емисию „Албум тижня”, а место дотерашнєй емисиї „Останьце нашмеяни“, кажди штварток на 12,30 г. будзе „Емисия за младих“, хтору у новей шеми правя студенти. После нєй, штварток будзе емисия „Портрет“ – о Руснацох котри зохабели даяки шлїд у нашей заєднїци.
Пияток на 12,10 г. идзе музична емисия, на 12,30 „Войводянски тидзень“, а потим, на 13 г. „Музика у шерцу“ – о Руснацох анґажованих у музичней творчосци. З нєзависней продукциї кажди пияток будзе емисия „Швет зоз другого угла“, хтора ше занїма з темами з облаци науки, волонтеризму, табуох и подобним, а почина на 13,30 годзин. Наступни мешац и пол, у рамикох емисиї „Войводянски тидзень“, кажди пияток на 12,30 годзин будзе емисия з нєзависней продукциї „Миниятури о макси темох“, хтора обрабя ключни идеолоґиї и дружтвени феномени 20. и 21. вику и як вони уплївовали на права женох.
Соботова програма почина з вистами на 6 г., а потим од 6,10 иду репризи емисийох „Дом и фамелия”, Златна єшень живота“ (на 7 г.), та „Музика у шерцу”, на 7,30 годзин. Пополадню, кажду соботу на 12,30 г. будзе „Емисия за дзеци“, а после нєй, на 13 г. „Соботово стретнуца“.
„Емисия за валал“ и надалєй у истим терминє – кажду нєдзелю на 7 годзин, а пред ню, на 6,10 „Хорска традиция”. На 6,30 г. будзе реприза емисиї „Портрет”, а внєдзелю пополадню на 12,10 идзе емисия „З народней студзенки”, потим „Културна панорама“ на 12,30 и вирска емисия „Хлїб наш насушни“ на 13,30 годзин.
Програму по руски тераз годно слухац и кажду стреду од 21,30 г. до пол ноци, односно до 8 годзин рано идуци дзень, а Ноцну програму кажду нєдзелю од 22,30 г. до пол ноци, односно 8 годзин рано пондзелок. Вноци ше емитує репризи емисийох и музика, алє и радио-драми (кажду стреду на пол ноци).
Кажди дзень, програму по руски на РНС мож слухац од 6 до 7,30 г. рано, та од 12 до 14,15 годзин пополадню. Пополадньова програма на руским язику РНС пол годзини кратша, алє достати вечарши термини, так же часово – простор рускей програми у етру нє зменшани.