Преробки з меса можу виволац рак

автор сен
946 Опатрене

ЖЕНЕВА – Вчера шветово и домашнї аґенциї пренєсли обяву Медзинародней аґенциї за виглєдованя канцеру при Шветовей здравственей орґанизациї, хтора сланїну, колбасу и шунку, та други сухомесово продукти, положела до ґрупи виволовачох раку, вєдно з доганом, азбестом и дизелскима ґазами, за хтори доказане же можу виволац рак. За тераз утвердзена їх вяза з раком черевох, раком панкреасу и простати, преноша аґенциї.

Ризик од канцеру ше звекшує з додаваньом рижних адитивох и конзервансох хтори предлужую рок тирваня, а неґативно дїйствує и термални обробок. Медзитим, Аґенция нагадує и же червене месо у цалосци канцероґене, та з додаваньом 100 ґрамох червеного меса до каждодньового костираня – ризик од розвою рака ше звекшує за 17 одсто.

– То нє значи же треба престац єсц червене месо, лєбо преробки, алє кед ше их є вельо, могло би ше почац роздумац о зменшованю количества – гварел професор Тим Ки з бритенскей аґенциї за виглєдованє канцеру.

Др Рейчел Томпсон гварела же то за ню нє новосц и додала же червене месо може допринєсц здравому и балансованому костираню кед ше го уноши умерено. Воно жридло протеинох, цинку, желєза и витемину Б12, алє преробене месо ма вельо менєй хасновити состойки, а у себе ма вельо масци и солї.

ПОВЯЗАНИ ТЕКСТИ