БЕОҐРАД – Влада Сербиї штварток, 3. марца, прилапела Акцийни план за витворйовнє правох националних меншинох хтори предвидзени у Акцийним планє за прегваряцке Поглавє 23 – Правосудство и основни права – преноша Танюґ и РТВ сообщенє з Кабинету подпредсидательки Влади и министерки державней управи и локалней самоуправи Кори Удовички.
Як поведзене, у вирабяню Акцийного плану окреме вжати до огляду предлоги националних совитох националних меншинох, а їх активне участвованє ше обчекує и у наступних фазох запровадзованя активносцох, як и у надпатраню применьованя Акцийного плану.
Република Сербия з прилапйованьом того плану за витворйованє правох националних меншинох заокружела свойо стратеґийне опредзелєнє за унапредзенє институцийних и законодавних рамикох у обласци людских и меншинских правох и шлєбодох, гвари ше у сообщеню.
Принєшена и Уредба о поступку розподзельованя средствох з Буджетного фонду за национални меншини, з чим сполнєни шицки условия за розподзельованє средствох и дальшу потримовку совитом националних меншинох.
За Буджетни фонд за национални меншини буду опредзелєни 1,8 милиони динари, а тоти средства буду розподзелєни по розписованю явного конкурсу.
З Уредбу ше блїжей уршорює критериюми, условия, способ и поступок розподзельованя средствох по Програми хтору приноши министер, а на предлог Совиту за национални меншини на уровню держави, у чиїм составу и национални совити.
Предписане и же на конкурсу маю право участвовац установи, здруженя, фондациї, привредни дружтва и други орґанизациї чийо сонователє национални совити националних меншинох и орґанизациї цивилного дружтва уписани до одвитуюцого реґистру, а хтори свойо цилї витворюю у обласци защити и унапредзеня правох и положеня припаднїкох националних меншинох, як и задужбини, фондациї, конференциї универзитетох, односно академийох фаховних студийох.
Поступок додзельованя средствох будзе запровадзовац комисия, наводзи ше у сообщеню.