НОВИ САД – Институт за явне здравє Войводини у вчерайшим сообщеню оценєл епидемиолоґийну ситуацию як позарядову у 40 општинох у Войводини, док у општинох Беочин, Житиште, Бач, Канїжа и Ириґ ситуация нєвигодна.
Число новореґистрованих случайох ше нєпреривно звекшує, а найвецей реґистровани случаї, як и потераз, єст у Новим Саду – 284.
Вкупне число активних случайох у покраїни виноши 9.077, а у главним городу Войводини єст 2.793 активни случаї зарази зоз коронавирусом.
У других општинох єст менєй як 1.000 реґистровани случаї коронавирусу, алє ше вшадзи реґиструє рост.
Институт апелує же би ше предлужело зоз преглашенима мирами пре зменшованє числа охорених од коронавируса, як и пре лєгчейше функционованє здравственей системи.
Институт поволал гражданох же би ше вакциновали у наступним периоду.