РУСКИ КЕРЕСТУР – Вовторок, 2. юния коло двох, пол трецей вноци, у Руским Керестуре згорела часц новшей хижи у улїци Якима Салонтая ч. 25 (у часци валалу ґу Косанчичу), власнїкох Душана и Даниєли Шаричових. Згорела цала половка закрица над хижу и над ґаражу коло нєй, єдна простория у хижи, як и часц закрица на другим боку.
Кед вибухнул огень, у хижи спали супруга Даниєла и тройо їх малолїтни дзеци основношколского возросту, як и ище єдно дзецко. Вони и обачели огень и доявели огньогасцом, а на щесце, нїхто з нїх нє покалїчени.
Перши на огень сцигли члени керестурского Добродзечного огньогасного дружтва, а потим и професийна огньогасна єдинка з Кули и огень загашени коло 4 годзин рано. До першей помоци прибегли и сушеди и ратовали, кельо могли.
Направена барз велька материялна чкода, а на огнїску була и полиция пре вишлїдзованє причини за палєнє огня. Нєурядово, предпоставка же го виволала жирячка з акумулатора, лєбо даякого другого жридла струї.
