БЕОҐРАД – Найхудобнєйши фамелиї у Сербиї з рока на рок лєгчейше ше можу найсц на списку енерґетски защицених купцох и так витвориц право на безплатну струю, пишу новини „Вечернє новости”.
Нєдавно ознова звекшани лимити приманьох котри условиє же би ґаздовства достали електричну енерґию без надополнєня, а на тот способ круг социялно загрожених котри можу конкуровац за „киловати на дарунок” вше векши.
Пред двома роками ґаздовства зоз єдним членом нє шмели на мешац доставац вецей як 12 900 динари же би достали безплатни киловати, а тераз тота гранїца премесцена на 13 595 динари. Двочлени або трочлени фамелиї на „подаровани киловати” могли раховац лєм кед им приходи були менши як 18 786 динари, а лимит нєшка 19 795 динари.
Фамелиї зоз штирома и пейцома членами доставаю киловати без плаценя кед заробя або достаню вкупно по 25 990 динари, а гранїца приманьох пред двома роками була 24 672 динари. Фамелиї зоз шейсцома и вецей членами маю лимит 32 684 динари, а скорей бул 30 558 динари.
Найчисленши фамелиї доставаю 250 киловати, а єдночленому худобному ґаздовству зоз рахунком можу буц „зняти” 120 киловати.
Зменшанє рахункох за електричну енерґию у януаре того року вихасновали лєм 53 254 ґаздовства зоз найнїзшима приманями, а право на нїх маю аж 250 тисячи у Сербиї.