НОВЕ ОРАХОВО – Националне швето Руснацох, вчера, 17. януара означене и у Новим Орахове. Зоз пригодну програму, вешельом и музику орґанизаторе здогадли на часи приселєня Руснацох до тих крайох, як и на приселєнє до того места.
Пригодна програма отримана у Руским доме, традицийно почала зоз шветочну шпиванку Браца Русини, потим наймладши члени читали реферат о насельованю Руснацох, о почежкосцох и радосцох котри провадзели наш народ през историю. Цалосна програма була преплєцена зоз музику и шпиванку, цо охабело окремни упечаток на присутних.
Госцох и домашнїх привитала предсидателька домашнього КУД „Петро Кузмяк” и наставнїца рускей виборней настави Татяна Дудаш, потим зоз пригодну бешеду предлужела предсидателька Одбору за образованє НС Руснацох Олена Папуґа, та предсидатель Општини Бачка Тополя Адриян Сатмари. Домашнїм чесц указали и парох Владислав Рац, представителє других локалних институцийох, як и секретарка Месней заєднїци Хайналка Шипош.
Орґанизатор програми були домашнї КУД „Петро Кузмяк” и Подручна канцелария Националного совиту Руснацох.
Скорей шветочней програми, одкрита памят плоча маст. Сенки Бенчик (1973–2021, родзеней Папуґа) котра допринєсла очуваню и розвою як руского так и сербского и мадярского язика у Новим Орахове и Бачкей Тополї. Плоча поставена на фамелийну хижу дзе вона одросла, на инициятиву єй шестрох и согражданох, културних и педаґоґийних активистох зоз потримовку КУД „Петро Кузмяк”, Националного совиту Руснацох, локалней самоуправи Бачка Тополя и Месней заєднїци Нове Орахово.