ВЕРБАС – Стреду вечар, 14. мая, Глас студентох Вербасу у центру городу на Площи Николи Пашича орґанизовал шветочни дочек за студентох зоз Беоґраду и Нового Саду котри иду пеши до Суботици, дзе на соботу ма буц отримани вельки протестни сход.
Вельке число Вербащанох и людзох зоз околних местох ше од 22 годзин позберало у центру Вербаса же би потримали младих людзох котри ше, як визначене, боря за правду, шлєбоду и достоїнство каждого чловека у тей жеми.
Зоз вельким галайком и аплаузами дочекани студенти коло пол ноци, а за нїх було порихтане єдзенє и ошвиженє. Тиж, за шицких студентох и стредньошколцох од коло 300 тих котри шейтали по Вербас обезпечене було и ноцованє по обисцох.
На дочеку студентох бул и матурант Ґимназиї Жарко Зренянин зоз Вербасу Алекса Пейович, котри на пожиченей бициґли ишол до Стразбуру. З тей нагоди му орґанизаторе подаровали бициґлу, цо випровадзене з моцним аплаузом.
Сход у центру Вербаса закончени зоз танцом ужичкого кола до котрого ше влапели шицки присутни, и вельким огньометом.
Ютредзень, пред поладньом студенти и стредньошколци предлужели свойо шейтанє по конєчну точку, а шлїдуюце место дзе буду дочекани и дзе прешпя то Бачка Тополя.
