НОВЕ ОРАХОВО/БАЧКА ТОПОЛЯ – Стретнуце рускей младежи у Новим Орахове и Бачкей Тополї почало, штварток, 6. авґуста, а тирвало по нєдзелю 9. авґуста.
Госци зоз 5 державох, коло 30 младих були змесцени у Дому школярох у Бачкей Тополї. Главни случованя були, углавним у Новим Орахове.
Пияток, 7. авґуста госцох у Руским доме дочекал шведски стол зоз руским єдзеньом, нащивена улїчка 13. май, а младим о єй значеню бешедовал Алексей Павлович зоз Суботици, тиж нащивена и грекокатолїцка церква. Того дня, пияток на 18 годзин була културно-уметнїцка програма у Доме култури, а на програми наступели домашнї члени КУД „Петро Кузмяк” и госци зоз русинского дружтва „Голубок” зоз Переґу Маре зоз Румуниї. Госцох привитал предсидатель Националного совиту Руснацох Стеван Самочета и предсидатель Рускей матки др Михайло Фейса,.
Всоботу 8. авґуста, нащивене озеро у Бачкей Тополї, стадион фодбалского клубу ТСЦ, а предвечаром на салашу „Варади” у Новим Орахове були спортски активносци.
Внедзелю 9. авґуста рано млади нащивели етно хижу у Новим Орахове, а после того отримана и нєурядова схадзка Шветовей ради Форуму младежи ШРРМ/ШФРМ. После схадзки нащивена хижа Сенки Бенчик, а на концу Стретнуца рускей младежи посадзени орех у Улїчки Штефана Чакана.
Стретнуце младих орґанизовал Месни одбор Рускей матки „Орех” зоз Нового Орахова и Форум младих Рускей матки, зоз потримовку општини Бачка Тополя, Месней заєднїци Нове Орахово и Националного совиту Руснацох.
