РУСКИ КЕРЕСТУР – Керестурске Добродзечне огньогасне дружтво стреду, 12. авґуста, коло 19 годзин достало дояву о огню на кулскей драги.
Троме огньогасци зоз єдним камионом вишли на терен и загашели даскельо громади на хторих була запалєна пластична амбалажа од пестицидох, цо приявене и полициї и професийней огньогасней єдинки.
По Закону о управяню зоз одпадом зоз 2025. року, за польопривреднїкох барз значне же би ше празну амбалажу од пестицидох нє третирало як обичну пластичну амбалажу понеже є контаминована зоз остатками отровних средствох, а окреме забранєне руцанє до природи и спальованє такей амбалажи. Предписани кари за нєправилне поступанє зоз амбалажним одпадом хтори заґадзени зоз опаснима материями за правни особи виноша од 500.000 по милион динари, а за физични особи од 5.000 по 50.000 динари або гарешт до 30 днї.
Таки материял потребне добре вимиц и чувац у одвоєней просториї, а зоз членом 23. Закона предписане же продукователь, увознїк або дистрибутер ма обовязку превжац амбалажни одпад.
Праве тих дньох, од 10. по 12. авґуст, у Руским Керестуре була орґанизована акция збераня одпадней амбалажи од пестицидох, хтору орґанизовала Польопривредна фахова служба Зомбор.