НОВИ САД – У Мадярским културним центре Петефи Шандор, всоботу, 10. октобра отримана XII Медзинародна наукова конференция Интеркултуралносц у образованю – ИнтерКулт 2026.
Як и назва того наукового сходу гутори, намира Конференциї представиц резултати актуалних виглєдованьох и промовованє интеркултуралносци, моцнєнє академскей мрежи домашнїх и фаховцох з иножемства з рижних дисциплинох хтори спатраю концепти интеркултуралносци у образованю
ИнтерКулт и того року конциповани так же отримане пленарне зашеданє з викладанями, а потим робота предлужена по тематичних сесийох. У рамикох Трецей сесиї, хтору модеровали др Ана Макишова и др Александер Мудри, представени интересантни роботи з словакистики и русинистики, дзе за нас окреме интересантни нови прилоги ґу биоґрафиї Петра Кузмяка и його фамелиї хтори презентовали мср Саша Сабадош и др Дюра Гарди, потим виглєдованє Александра Мудрого и Анити Ґовля о концепту Кирбаю при Руснацох з културолоґийного и линґвистичного аспекту, як и анализа интеркултуралносци у медзивойнових Руских новинох на основи друкованих литературних творох преложених з других язикох, хторе пририхтали др Ана Римар Симунович и Александра Деянович.
Конференцию ИнтерКулт 2026 орґанизовали Педаґоґийни завод Войводини, оддзелєня за гунґаролоґию, румунистику, русинистику и словакистику Филозофского факултетa Универзитета у Новом Саду и Учительски факултет на мадярским наставним язику у Суботици.
