НОВИ САД – Тогорочну Награду за найлєпшого младого виглєдовача з обласци дружтвених и гуманистичних наукох на Филозофским факултету у Новим Садзе достал социолоґ др Алексей Кишюгас, доцент на спомнутим факултету.
Награда др Кишюгасови додзелєна з нагоди означованя Дня Филозофского факултету, а уручена му є на Трецим Медзинародним интердисциплинарним сходзе младих науковцох дружтвених и гуманистичних наукох „Контексти”.
– Зна буц дакеди аж и напарте паралелно отримовац преподаваня и занїмац ше з наукову роботу. Но, и попри тим, награда як тота вше одредзена файта припознаня и спознанє же маце потримовку за свою роботу – гварел др Кишюгас з нагоди доставаня Награди за найлєпшого младого виглєдовача на Филозофским факултету.
Визначел же за науковцох барз важни таки и подобни медзинародни сходи як цо орґанизовани з нагоди 61. рочнїци Филозофского факултету, насампредз пре черанку искуствох з колеґами з других жемох.