У Доме здравя у Кули хибя специялисти, та ше анґажовало єдного очного специялисту и двох ґинеколоґох, а догваря ше и зоз специялистом спортскей медицини. Зоз општинского буджета видвоєни и 3,75 милиони динари за купованє превозки Швидкей помоци. Керестур по числу жительох на законскей гранїци же би мал двох лїкарох общей пракси, алє кед єден пойдзе на рочни одпочивок, нє мож обезпечиц замену за другого.
У Доме здравя у Кули, нєодлуга би мали почац робиц тройо лїкаре специялисти хтори хибели, а то офталмолоґ (очни лїкар), ґинеколоґ и специялиста спортскей медицини, хтори буду анґажовани два раз або три раз до тижня, накадзи ше тих дньох з нїма подпише контракти – виявел за „Руске слово” директор Дома здрава др Жарко Шевин. Кулски Дом здравя бул примушени анґажовац нових специялистох, бо уж од скорей хиби ґинеколоґ, а однєдавна и очни лїкар, та прето настала права конфузия за вельочислених пациєнтох. Понеже Министерство здравя нє одобрело їх анґажованє, конкретно помогла локална самоуправа, хтора, по словох заменїка предсидателя Општини Кула Велибора Милоїчича, видвої 3,6 милиони динари рочно за анґажованє лїкарох-специялистох.
По словох др Шевина, до очней амбуланти у Кули, будзе приходзиц др Снежана Маркович, до ґинеколоґийней у Червинки ґинеколоґ зоз Србобрану, дзе дочасово анґажовани и пензионовани др Луткич, так же буду робиц двоме ґинеколоґове, а догваря ше и зоз специялистом спортскей медицини. Як визначел др Шевин, пре абсолутни нєдостаток кадрох специялистох, котрих нє мож найсц на евиденциї Националней служби за нєзанятих, то затераз єдине можлїве ришенє.
НОВА ПРЕВОЗКА ЗА ШВИДКУ ПОМОЦ
Дом здравя Кула, 10. фебруара, достал нову превозку за Швидку помоц, вредносци 3,75 милиони динари, а пенєж за купованє обезпечени з општинского буджета. Ключи од новей превозки директорови Дома здравя др Жаркови Шевинови придал заменїк предсидателя Општини Кула, Велибор Милоїчич. Як з тей нагоди гварел др Шевин, остатня превозка за Швидку помоц до кулского Дома здравя обезпечена ище 2007. року, так же то будзе велька помоц у роботи, бо лєм прешлого року превежени коло 2 000 пациєнти, нє рахуюци тих котри иду на диялизу.
– З локалней самоуправи нєдавно наявени и други новини у ришованю вельочислених и рижнородних проблемох у функционованю кулского Дома здравя. Так Општина Кула за Дом здравя пошвидко планує набавиц и ултразвучни апарат, вредносци коло 3 милиони динари, потим опредзелєли и 5 милиони динари за технїчне отримованє и оправянє обєктох Дома здравя, як и 2 милиони за одплацованє камати на длуство за лїки. Пошвидко будзе розписана и явна набавка за пораєнє простору на месце дзе була Народна библиотека, дзе би мала почац вибудов нового обєкта за специялистични служби, и у тим обчекуєме потримовку и од ресорного министерства – гварел медзи иншим, Велибор Милоїчич.
ГРОЖИ ДЛУСТВО ЗА ЛЇКИ
Спатраюци ґенезу укладаньох до здравства дзе локална самоуправа од 2007. року превжала сновательни права, як гвари директор др Жарко Шевин, видно же ше по 2011. рок рочна сума укладаньох драстично зменшала зоз скоро 5,3 милиони динари. Од 2012. року почала роснуц такой на 7 и пол милиони динари, а шлїдуюци два роки спадла на по 3 милиони, а влонї ше ознова звекшала на 6 милиони 775 тисячи динари.
– За 2016. рок зоз буджету нам плановани 13 милиони динари цо треба похвалїц. Медзитим, мушим визначиц же Дом здравя ма вельки бриґи пре барз вельке длуство ґу добавячом лїкох, а на дньовим уровню ше ище задлужує за нови, приблїжно, 250 000 динари. Кед же ше за ришованє того огромного длуства нє найдзе даяке стратеґийне ришенє мушим повесц же функционованє Дома здравя будзе нєизвесне – заключел др Шевин.
Шлїдуюци проблем хтори трапи тоту здравствену установу то и поступок рационализациї роботних местох дзе ше муши ришиц звишок петнац занятих у Доме здравя, дзе робя єден стоматолоґ, шейсц роботнїки у администрациї и осем пораячки. Як визначел директор Шевин, и то нєприємна длужносц, алє ше закон муши випочитовац.
ДВОМЕ ЛЇКАРЕ У КЕРЕСТУРЕ
У керестурскей Здравственей амбуланти ознова єст проблеми хтори револтую жительох, а то же єден длугши час нє робел педиятер, а на общей пракси од нового року знова роби лєм єдна лїкарка. На тоти питаня директор Дома здравя одвитовал же вони пре обєктивни причини.
– Керестур по числу жительох на законскей гранїци же би мал право на двох лїкарох общей пракси. Заш лєм, нєдавно до амбуланти обезпечени и други лїкар, алє кед єден пойдзе на рочни одпочивок, Дом здравя нє ма можлївосци обезпечиц замену. Прето нє робел и педиятер, а и др общей пракси, хтора у медзичаше остала на законским одсуству и пре два случаї шмерци у блїзкей фамелиї – потолковал др Шевин.