РУСКИ КЕРЕСТУР – Локалнa преслава Националного швета Руснацох у Републики Сербиї, вчера 16. януара, означена и у Руским Керестуре, у Доме култури, у дакедишнїм „Клубу 10ˮ.
Шветочну програму отворела Женска шпивацка ґрупа Дома култури зоз гимну Републики Сербиї „Боже правдеˮ и шветочну шпиванку „Браца Русиниˮ, а у провадзеню Народного оркестра „Юлиян Рамач Чамоˮ чий руководитель Кристиян Няради.
Присутних потим привитал и повинчовал швето предсидатель Националного совиту Стеван Самочета, а даскельо пригодни слова виповед и предсидатель општини Кула Дамян Милянич.
У предлуженю програми, зоз даскелїма шпиванками наступели – Дзивоцка и Женска шпивацка ґрупа у провадзеню Народного оркестру „Юлиян Рамач Чамоˮ, як и младого Теодора Гарвильчака на гармоники, док Олеґ Катона одрецитовал писню „Чи ши чул синуˮ.
Попри числених представительох валалских установох и институцийох, на програми були присутни и заменїк предсидателя Општини Кули Кароль Валка, як и предсидатель СУБНОР општини Кула Жарко Попович.
После програми предлужене друженє зоз руску музику и закуску руских традицийних єдлох.
