НОВИ САД – На Першенству Войводини за младших пионирох хторе було отримане всоботу, 21. фебруара у Новим Садзе у гали 1 на новосадским сайму, змагали ше и младши пионире зоз Руского Керестура спред АК Русин.
На Першенству ше змагали: Зара Малацко (скаканє до далєка), Ела Колєсар (скаканє до далєка), Анастасия Пекич (скаканє до далєка и до висока), Николая Медєши (скаканє до далєка и до висока), Хана Симич (руцанє кулї – 2 кґ), Елена Ґолубович (бежанє на 60м), Андєлина Блаґоєвич (бежанє на 60м) и Алексей Преґун (скаканє до далєка и до висока).
Нашо млади атлетичаре по першираз участвовали на таким уровню змаганя, та мали и трему, а як гварела тренер Саня Еделински, задовольна є зоз реултатами.
Найблїжей при освойованю медалї була Анастасия Пекич, хтора у дисциплини скоку до висока завжала 4. место, зоз прескочену висину од 1,15 м.
Орґанизатор Першенства Войводини у Новим Садзе за младших пионирох бул Атлетски союз Войводини (АСВ), по пропозицийох и правилох Сербского Атлетского союзу (САС).
