РУСКИ КЕРЕСТУР – Националне швето Руснацох у Сербиї, вчера, 17. януара зоз шветочну програму означене у школским голу Основней и штреднєй школи зоз домом школярох „Петро Кузмяк”.
Програма почала зоз шветочну шпиванку Руснацох у Сербиї „Браца Русини” котру одпшпивали школяре штвартей класи основней школи.
Швето потим шицким пристуним просвитним роботнїком и школяром висших класох основней школи и штредньошколцом по руски и по сербски повинчовала директорка Школи Наталия Будински. Вона визначела же дзекуюци правим вредносцом котри пестовали нашо предки, образованє, вира и традиция, та дзекуюци їх визиї ми маме нєшка и тоту школу дзе ше витворюю фундаменти за лєпшу будучносц и рускей и локалней заєднїци.
Потим ґимназиялци з трецей и штвартей класи рускей ґимназиї цикаво представели прегляд найважнєйших одреднїцох о нашей заєднїци, од прешлосци по нєшкайши днї, младши школяре и рецитовали а ґимназиялки програму закончели з руску шпиванку.
Програму зоз школярами пририхтали учительки Любица Бучко и Ясминка Сабадош и професорка Люпка Малацко.
