Оптимистични привитни слова на преслави Националного швета

автор М. Джуджар, фото: В. Вуячич
99 Опатрене

СРИМСКА МИТРОВИЦА – На шветочней академиї з нагоди преслави Националного швета Руснацох у Сербиї котре було отримане у Театру Добрица Милутинович, присутних поздравели визначни особи спред рускей заєднїци и зоз уровня державней, покраїнскей и локалней власци. Медзи госцами були и амбасадор України у Републики Сербиї (РС) Володимир Толкач, сримски бискуп монсиньор Фабиян Свалина, покраїнска омбудсманка др Драґана Чорич, державна секретарка у Министерстве просвити Анико Єрас и державни секретар у Министерстве державней управи и локалней самоуправи Александра Петрович.

Академия розпочала зоз привитнима бешедами з огляднуцом на историю Руснацох и соживот зоз векшинским народом и другима националнима меншинами на тих просторох. Бешедовали: предсидатель Националного совиту Руснацох (НСР) Йоаким Рац и преосвящени владика кир Георгий Джуджар, потим заменїца городоначальнїка Сримекей Митровици Даница Недич, та помоцнїца покраїнскей секретарки за културу, явне информованє и одношеня зоз вирскима заєднїцами Невена Баштованович, як и совитнїк зоз кабинету предсидателя Влади РС Саво Стамболич.

– Стретаме ше на означованю националного швета Руснацох, други раз у Сримскей Митровици. Тоти стретнуца права нагода же бизме ше зишли як найблїзша родзина и у шветочней атмосфери ище раз потвердзели же руска заєднїца у РС ма моци, сцелосци и дзеки позберац ше и мобилизовац коло заєднїцкей идеї. Национални совит и його члени здобули угляд у шицких локалних смоуправох дзе присутни припаднїки нашей заєднїци, а дзекуюци анґажованю Координациї националних совитох и при ношительох найвисших институцийох на державним уровню. Робота НСР окрем других активносцох и надалєй будзе пошвецена очуваню руских оддзелєньох у основним и штредньошколским образованю, ширеню образованя у виборней настави, а окреме у обновйованю руских оддзелєньох у предшколским образованю. Думам же НСР ма моци зочовац ше зоз шицкима проблемами, алє потребна нам и помоц шицких котрим руски национални идентитет и интерес у першим плану. Як сом раз написал, кед єст добрей дзеки, кед почитуєме єдни других, кед обєдинюєме єдни других за очуванє нашого идентитета, так як то виками робели нашо предки, вец муша буц и резултати. Зоз тим наздаваньом шицким Рускиньом и Руснацом як и шицким добрим людзом з котрима вєдно виками жиєме и робиме на тих просторох винчуєм Националне швето – гварел предсидатель НСР Йоаким Рац, а попри тим у своєй бешеди направел огляднуце и на активносци котри би требало превжац коло подзвигованя националней свидомосци.

– Почитовани представителє явного живота, почитовани представителє наших институцийох и шицки почитовани учашнїки на шветочней академиї, преслави националного швета Руснацох, Зоз преславу националного швета намагаме ше потримац нашу заєднїцу же би далєй предлужела исц по тей драги, по драги своїх предкох котри були свидоми важносци у националней и вирскей припадносци и очуваня и пестованя. Национална припаданосц нам дата як дар од Бога и нїхто ю себе нє може вибрац, анї ше нам нє питали якей народносци ше народзиме. Прето тот вельки дар треба пестовац, залївац, потримовац, треба го жиц, и треба го придац будуцим поколєньом. Ми превжали тот дар и свидомо идземе по тей драги, по драги злагоди, мира и по драги любови. То рецепт нашей витирвалосци и длуговичносци, най так будзе и на будуце. А преславйованє националного швета най будзе за нас шицких надихнуце обновеня свидомосци националней припадносци за яку вимодлюєме и на будуце Божи благослов, щешлїве националне швето – повинчовал владика кир Георгий Джуджар.

– Мам окремну чесц же бим вас поздравела у мено городу Сримска Митровица, нєшка зме ше зишли пре шветочну и радосну нагоду, прето бим насампредз скорей шицкого повинчовала националне швето Руснацох у Сербиї шицким припаднїком тей националней меншини – визначела заменїца городоначалнїка Сримскей Митровици Даница Недич котра потим направела и огляднуце як руски народ пришол до Войводини, та и до Сриму, и на яки способ тот народ збогацел тутейши простори.

– Почитовани припаднїки рускей заєднїци, мили госци, шицких вас поздравям по шоре и чесци котра вам припада. У мено Покраїнского секретарияту, як и у мено секретарки Бояни Чирич Бошкович винчуєм вам националне швето. Руска заєднїца єдна з автохтоних и найстарших меншинских заєднїцох на тих просторох забера окремне место у богатим културним и историйним мозаїку нашей держави – медзи иншим гварела помоцнїца покраїнскей секретарки за културу, явне информованє и одношеня зоз вирскима заєднїцами Невена Баштованович

– Винчуєм вам швето у мено премиєра Милоша Вучевича, преношим вам винчованки и поздрави, а винчуєм и у мойо мено. Перши 200 руски фамелиї були медзи тима котри пришли на тоти, теди давно нєгосцолюбиви простори, а котри праве ту направели тото цо нєшка маме. Шицки руски установи маю потримовку держави Сербиї, и наглашуєм же премиєрови Вучевичови наисце важне же би руска заєднїца була уважена и же би витворйовала шицки свойо права – винчовал совитнїк зоз кабинету предсидателя Влади Републики Сербиї Сава Стамболич.

ПОВЯЗАНИ ТЕКСТИ