РУСКИ КЕРЕСТУР – До Основней школи „Петро Кузмяк” початком тижня сцигли два учебнїки за руски язик за першу класу, хтори хибели у комплету учебнїкох ище на початку того 2024/25. року. Достали их 36-еро першокласнїки у двох оддзелєньох.
Роби ше о обновеним тиражу учебнїкох „Писанки” и „Читанки” як и „Букварнїци”, видал их Завод за учебнїки Беоґрад, а видруковани су дзекуюци ребалансу републичного Буджету.
Понеже тоти учебнїки нє сцигли на початку рока пре нєдостаток финансийних средствох, анґажовали ше Одбори за образованє вецей националних совитох та и нашого, на чолє з предсидательку Одбору Олену Папуґа.
Щесце у шицким же ше „Писанка” и „Читанка” хасную аж у другим полрочю та випадло же сцигли на час, окрем „Букварнїци”, а добре и же их локални самоуправи виплацели у комплету учебнїкох за першу класу, котри иншак финансую.
