РУСКИ КЕРЕСТУР – На вчера вечар отриманей схадзки Совиту Месней заєднїци, єдногласно прилапени Финансийни план Месней заєднїци (МЗ) за 2023. рок и План явних набавкох за наступни рок. Потим отримана и шветочна схадзка Совиту зоз представителями 17 валалских здруженьох и институцийох.
Предсидатель Совиту МЗ Владимир Олеяр потолковал же у Финансийним плану предвидзени 4.103.000 динари за стандрадни активносци Месней заєднїци, а нове од шлїдуюцого року же финансованє Спортскей гали хторе по тераз ишло прейґ МЗ будзе пренєшене на Спортски центер Кула, насампредз пре лєгчейше запровадзованє предвидзених процедурох.
Як визначене, уж виробени значнєйши проєкти хтори нє витворени пре пандемию и други обставини, и далєй на чеканю, а идущого року би мал буц виробени и проєкт за валалску канализацию. За тото опредзелєне 11 милиони динари.
Месна заєднїца и того року обезпечела огньомет, хтори будзе нєшка на 00 годзин з дочеком Нового року.
По схадзки Совиту, шлїдзела традицийна шветочна схадзка зоз валалскима здруженями и институциями, на хторей їх представителє кратко представели свою роботу и найзначнєйши посцигнуца и почежкосци у прешлим року як и плани у наиходзацим.
Шицки визначели зложносц и добре сотруднїцтво медзи шицкима субєктами у валалє, за добро його жительох, а то визначене як приоритет и надалєй.
