НАШО МЕСТА – Нєшка, на дзень Националного швета Руснацох, у подручних канцеларийох НС, з нагоди швета ше отримує пригодни програми.
Националне швето Руснацох будзе означене у Дюрдьове у просторийох КУД „Тарас Шевченко”, шветочна програма почнє традицийно на 12 годзин, а у Ґосподїнцох програма будзе отримана у Месней заєднїци на 14 годзин.
У Шидзе у КПД „Дюра Киш” програма почнє на 18 годзин. У Сримскей Митровици Швето будзе означене на 18 годзин у Музею Сриму. На 19 годзин Националне швето будзе означене у Новим Садзе у Руским културним центру, а источашнє почнє програма и у Суботици у просторийох Дружтва Руснацох у Суботици.
На стреду, 18. януара на 16 годзин швето преславя Руснаци у Кули, а истого дня на 18 годзин, дзень Руснацох будзе означени у школи у Бачинцох, а у орґанизациї Подручней канцелариї НС и КПД „Драґутин Драґен Колєсар”.
На штварток 19. януара швето будзе означене у Бикичу у Доме култури з програму на 18 годзин, у орґанизациї Подручней канцелариї НС и КПД „Иван Котляревски”.
У Руским Керестуре програма будзе отримана у Дому култури 20. януара з початком на 18 годзин. Док у Вербаше у КПД „Карпати” Националне швето Руснацох будзе означене 3. фебруара.
Централна програма будзе отримана на соботу, 21. януара, а шветочносц почнє на 17 годзин зоз Архиєрейску благодарну Службу Божу у коцурскей церкви Успения Пресвятей Богородици, на 18 годзин будзе вистава коцурских уметнїкох малюнкох Миколи Буши, Силвестера Пушкаша и скулптурох Силвестера Макая у просторийох Каритасу, а етно стол будзе у Церковней сали. Шветочна академия почнє на 20 годзин у Биоскопе „Югославия” у Вербаше.