Природна козметика найздравша драга по красу

автор Л. Вереш
451 Опатрене

Балзами, лїковити масци, креми за осип, креми зоз SPF-ом, масло за цело, тоники, олєї за власи и нохци, шущаци купки за купанє, дезодоранс помади и миделка. Шицко з руку правене и прилагодзене ґу потребом трошительох.

Гоч сом по фаху ґеометeр, нє пренашла сом ше у тей роботи и одлучела сом же почнєм робиц тото цо ме одмалючка цикавело. Ище як штири-пейц рочне дзивче сом першираз пробовала направиц помаду так же сом зазберовала квеце по дворе и била по нїм зоз каменьчками. Нормално же ми ше то нє удало – през шмих започина нашу розгварку Даница.

Познєйше Даница почала предавац козметику познатого бренда и гвари же ю тота робота уведла до швета козметики. Теди нє обрацала вельо уваги зоз чого тота козметика направена, бо єй то нє було важне. З часом и сама похопела кельо даєдни состойки чкодза нашому орґанизму и помали преставала хасновац куповну козметику, а кед народзела свойо перше дзецко скроз престала хасновац куповну козметику и почала хасновац лєм природну.

– Кед сом народзела свойо перше дзивче, обачела сом же беба ма барз чувствительну скору. Часто ше єй зявйовал осип, хтори барз чежко преходзел, лєбо екцем по лїцу, рукох и ногох. Як и кажда мац, та так и я, барз сом ше злєкла и одвела сом ю до дерматолоґа хтори єй преписал барз драги креми, зоз барз подлим составом и то бул момент кед сом гварела же досц. Нє сцела сом хасновац на своїм дзецку хемию, а тиж так ю анї я нє сцела хасновац. Теди и моя мац мала проблеми зоз скору, та кед ше шицко тото поскладало, ришела сом же за свойо мили особи направим дацо цо природне и нє чкодзи анї нам, анї природи – гвари Кроничова.

НАЙВАЖНЄЙША ДОБРА ОРҐАНИЗАЦИЯ

Знанє здобувала на рижни способи. За виробок продуктох ишла на рижни курси и обуки, а о рошлїнох и етеричних олєйох учела и учи сама.

Нєшка Даница у понукнуцу ма рижни продукти хтори ше углавном можу хаснивац на вецей способи. Нє огранїчени су лєм на єден способ хаснованя, як векшина продуктох хтори мож купиц у дутяну. Предава балзами, лїковити масци, помади за осип, креми зоз SPF-ом, масло за цело, тоники, олєї за власи и нохци, шущаци купки за купанє, дезодоранс помади и миделка.

– Перше сом направела лїковиту масц, бо нам була найнєобходнєйша и знала сом же з ню нє шмем погришиц. Нєшка кед сом мац штверих дзецох, вельо раз ми чежко покончиц шицко цо мам у плану. Найважнєйша добра орґанизация. Одредзим приоритети, а за друге кед останє часу. За кажди продукт ми треба одредзени час же бим го направела. Даєдни ше прави швидше, а даєдни помалши. За миделка ми треба найвецей часу, бо ше вони муша длуго сушиц – толкує наша собешеднїца.

ПРОМОЦИЯ НА ИНСТАҐРАМУ

Свою козметику Даница найвецей промовує на Инстаґрам профилу coda.cosmetics. Цода єй назвиско. Кед здумовала назву за свой бренд, анї єдно предкладанє хторе мала ше єй нє пачело. Тото мено случайно пришло и остало. Кратке є и лєгко ше памета.

На своїм Инстаґрам профилу Даница ше намага и дац цо вецей совити о отримованю красоти и правилним стараню о скори. Барз є щешлїва же направела малу заєднїцу людзох хтори водза рахунку о своїм здравю и жадаю пременїц подли звикнуца. Познєйше би любела шицко тото дзвигнуц на висши уровень и свою козметику понукнуц ширшому кругу людзох.

– Продукти наменєни шицким возростом. Можу их хасновац дзеци, жени, хлопи и старши особи. Намагам ше же бим хасновала состойки хтори ше аж можу и єсц, бо ше водзим зоз мотивом – ,,Гевто цо бим нє поєдла, нє намасцим анї на свою скору”. Скора наш найвекши орґан и шицко цо положиме на ню вона упиє до кревоцеку. Чом бизме вец хасновали дацо цо би нам могло начкодзиц?

Преход на природну козметику бим препоручела найвецей пре здравє. Тераз кед шицко коло нас заґадзене, нє видзим потребу же бизме додатно уношели токсини до орґанизму кед маме безпечнєйшу опцию – закончує Даница нашу розгварку.

ПОВЯЗАНИ ТЕКСТИ