КРАКОВ (ПОЛЬСКА) – Нова руководителька Восточноевропскей комисиї Польскей академиї наукох проф. др Олена Дуц-Файфер роками зоз своїма науковима роботами вязана за роботу Комисиї, а у остатнїм чаше була и на функциї секретара. На функциї предсидателя Комисиї заменєла др Андрея Зембу, преноши Радио лем.фм.
Проф. др Олена Дуц-Файфер почитовани науковец специялизована за литературу и виучованє култури и язика Лемкох. Єй науково досцигнуца и искуство у реализациї интердисциплинарних проєктох уклапюю ше до мисиї Комисиї и Польскей академиї наукох (ПАН).
Главни обласци дїлованя Комисиї уключую виучованє жемох восточней Европи – Билорусию, Русию и Україну у контексту їх историї и сучасних проблемох. Комисия виучує широки спектер темох зоз археолоґиї, историї, язика, писменосци, релиґиї, уметносци, политичних наукох и социолоґиї.
У рамикох роботи Комисиї орґанизує ше науково сесиї, обявює ше науково роботи, як обсяжни так и монотематични, як цо то „Лемкы і лемкознавство в Польщы”, лєбо „Формулы патріотизму в Східній і Центральній Европі од нового часу до сучасности” под редакторством А. Земби.
Як преноши Радио лем.фм авторство новей ведуцей Комисиї, проф. др Олени Дуц-Файфер ма популарну и єдину таку литературну моноґрафию хтора виглєдує текстуалне нашлїдство Лемкох – „Лемківска література в другій половині ХІХ і на початку ХХ ст.”. Моноґрафия обявена у рамикох публикациї „Етнїчно-национални питаня на гранїцох восточних и заходних Славянох. Русински рух у Словацкей, України и Польскей” авторки др Еви Михни.
Польска академия уметносцох престижна наукова институция зоз длугорочну традицию ище од 1872. року у Кракове. ПАН ма значну улогу у розвою польскей науки, потримуюци интердисциплинарни виглєдованя, науково публикациї и медзинародне сотруднїцтво. То платформа за черанє знаня и искуства.