НАШО МЕСТА – Централна шветочносц означованя Националного швета Руснацох у Републики Сербиї того року будзе отримана у Сримскей Митровици на соботу, 18. януара. З пригоднима програмами Националне швето будзе означене и у других местох у хторих жию Руснаци.
По информацийох яки сцигли зоз служби нашого Националного совиту, у векшини местох одредзени датуми локалних преславох Националного швета Руснацох у Сербиї.
У Вербаше у просторийох Културно-просвитного дружтва „Карпати” швето означене 10. януара .
На стреду, 15. януара швето означа у Бачинцох у малей сали Дома култури на 19 годзин.
На штварток 16. януара Националне швето Руснацох будзе означене у Коцуре на 18 годзин, у просторийох Подручней канцелариї и у Бикичу у Дружтве „Иван Котляревски” на 18 годзин.
На пияток, 17. януара перши швето означа Дюрдьовчанє на 12 годзин у просторийох КУД „Тарас Шевченко”. На 13 годзин швето преславя Руснаци у Кули у просторийох РКУД „Гаврил Костелник”. У Новим Орахове на 16 годзин на фамелийней хижи Папуґових будзе одкрита спомин-плоча Сенки Бенчик, а на 17 годзин будзе пригодна програма у просторийох КУД „Петро Кузмяк”. У Руским Керестуре, преслава почнє на 18 годзин у Доме култури, у Шидзе у КПД „Дюра Киш” тиж на 18 годзин, а у Руским културним центре у Новим Садзе на 19 годзин.
Централна програма будзе отримана на соботу, 18. януара у Сримскей Митровици, а шветочносц почнє зоз Архиєрейну Службу Божу на 16 годзин у Церкви Вознесения Господнього, у парохиялней сали будзе етно стол, а на 18 годзин з нагоди 100 рокох од першого виданя „Руских новинох” и 80 рокох Новинско-видавательней установи „Руске слово” буду Усни новини у Шветочней сали Музичней школи „Петар Краньчевич”. На 19:15 годзин у Голу Театра „Добрица Милутинович” отвори ше виставу Ясни Арбанас. Шветочна академия почнє на 20 годзин у Велькей сали Театра „Добрица Милутинович” у Сримскей Митровици.