ВЕРБАС – У центру Вербасу на Площи Николи Пашича стреду вечар ше позберали числени гражданє же би послали потримовку Дияни Хрка, и Миломирови Ячимовичови и його малолїтному синови котри уж вецей днї штрайкую з гладом покля власц нє сполнї їх вимоги.
Мирни сход, котри обезпечовали вецей єдинки милициї же би зопарли можлїви инциденти, почал зоз застановяньом транспорту у центру Вербасу. После пол годзини од початку сходу, присутни мирно формовали колону и прешейтали по главней улїчки у напряме главней Автобускей станїци. Там ше застановели и блокирали виходи зоз автобускей станїци и так онєможлївели автобусом же би ше уключели до транспорту. Блокада автобускей станїци тирвала годзину, а гражданє на тот способ жадали потримац превознїка Ячимовича котрому одняти автобуси и грожа му огромни пенєжни кари. Як визначене на тей блокади, кед нє вожи Ячимович, нє будзе вожиц нїхто.
На сходу могло чуц слова нєскладаня зоз поступаньом власци спрам Дияни Хрка и Ячимовичох, як и слова потримовки и порозуменя за їх поступки.
