ПРАГА/ДРЕЗДЕН – Школяре Основней и штреднєй школи зоз Домом школярох Петро Кузмяк з Руского Керестура, єй напряму Туристичного технїчара, тих дньох пребуваю на фаховей екскурзиї у Праги и Дрездену.
Путованє ше отримує у орґанизациї Универзитету Синґидунум, а школяре одпутовали вєдно зоз своїма наставнїцами Єлену Миркович и Бояну Милянич.
Прейґ дружтвених мрежох школяре поручели же потераз обишли главни город Ческей Републики – Прагу, як и город Дрезден у Нємецкей, дзе пообиходзели шицки значнєйши знаменїтосци тих двох европских городох.
