Студенти хтори у блокади длужей як шейсц мешаци добитнїки тогорочней награди „Доприношенє рока Европи”, хтору додзелює Европски рух у Сербиї. У обгрунтованю ше, медзи иншим, наводзи же млади тоти котри би требали креировац политику у Сербиї, алє и у Европи.
Студенти награду заслужели пре свойо поступки, одвичательносц и виру же Сербия и Европа можу и муша робиц лєпше. Указали цо значи завжац ше за гевто цо чесне и моралне, аж и у таких часох кед вельо лєгчейше буц цихо.
Представитель студентох, котрому уручена награда, гварел же вецей як шейсц мешаци витирвали у борби з виру до правди и до дружтва котре заслужує буц шлєбодне, и у котрим институциї робя свою роботу. Студентски вимоги и далєй нє сполнєни и борба будзе тирвац док ше их нє сполнї, гваря студенти у блокади. Предлужую як и до тераз – мирно и достоїнствено, водзени з виру же пременки можлїви. Студентска борба вишла з рамикох Сербиї, и прейґ бициґлистох и маратонцох ше чує и ширцом по Европи.
Тото припознанє указує же студенти нє сами, же су у заєднїцтве, а шмелосц и борба за демократски вредносци препознати и можу пременїц стварносц. Студентски рух постал видлїви, як и їх труд, глас и борба котру водза уж вецей як пол рока.
Предсидатель Европского руху у Сербиї Радомир Диклич, хтори награду уручел вєдно зоз предсидательом Медзинародного европского руху Ґи Верхофштатом, визначел же млади вецей як пол рока браня свою жем, достоїнство, право на образованє, шлєбоду бешеди, одвичательносц институцийох и идею демократского дружтва.
– У хвильки кед одлучели блокирац факултети, вони розкивали до теди анестезирани дружтвени простор, и отворели процес превипитованя дружтва хторе предлуго було цихо. Їх борба нє виключно академска, вона гражданска, сущна, европска и, насампредз, морална – гварел Диклич, а пренєсол Фонет.
Як визначел Диклич, студенти зоз своїм безкомпромисним ставом порушали тото цо Сербия ма – солидарносц и емпатию, заблїсли и порушали Европу и здогадли шицких же граждански вредносци жию, кед их єст хто бранїц.
ruske.redaktorka@gmail.com