ШИД – У Руским доме вчера, 17. януара з пригодну програму означене националне швето Руснацох, а програма почала зоз гимну „Боже правде“ и шветочну шпиванку Руснацох „Браца Русини“ хтори одшпивала Старша шпивацка ґрупа КПД „Дюра Киш“.
Привитни слова з тей шветочней нагоди виповед о. Владимир Еделински Миколка, хтори наглашел же Руснаци на тих просторох уж виками исную як заєднїца хтора пестує свою виру, язик и традицию и так будзе и на далєй.
Тема означованя швета то увилей 80 роки иснованя НВУ „Руске слово“, а модератор вечара Мирослав М. Цирба по руски и Йована Петрович по сербски, представели розвойну драгу „Руского слова “ од першого числа 15. юния 1945. року по нєшка.
У уметнїцкей часци програми наступела Старша шпивацка ґрупа КПД „Дюра Киш“ з венчиком руских народних шпиванкох, а одшпивали и шпиванку „Тайна винове лозе“.
Швето була нагода представиц младих уметнїкох, наступели школяре музичней школи „Филип Вишнїч“: Коста Гнатко на клавиру, шестри Маруся и Ана Цирбово на флаути, Вукашин Деґенек на приму и Йована Петрович на клавиру.
Два писнї Венямина Бульчика интерпретовал Мирон Джуджар, а писателька и поетеса Саня Тиркайло пречитала виривок зоз свойого романа „Ирина“.
Програму провадзели помоцнїца предсидателя општини Шид Єлена Шушкич, покраїнска посланїца Деяна Крсманович, паноцове о. Михайло Режак и о. Владимир Еделински Миколка, члени Националного совиту Руснацох, представнїки наших КПД зоз Бачинцох и Бикичу як и СКУД „Єднота“ зоз Шиду, почесни член др Бранислав Маукович и други.
После урядовей програми друженє предлужене на коктелу за шицких нащивительох.
