НОВИ САД – У найновшим, 28. числу новинох „Руске слово”, у рубрики Тижньовнїк звит о резултатох з руского язика на Закончуюцим испиту осмакох, Коцурцох и Керестурцох.
У рубрики Нашо места зазначени вецей теми по наших местох: ришени вецейрочни проблем слабого прецеканя води у керестурским базену, у Шидзе ше вше вецей будує будинки з квартелями и дїловним простором, отримане и перше онлайн зашеданє XII зволаня Шветовей ради русинскей младежи.
На бокох Економия написи о законченей тлачидби жита у Дюрдьове и на подручу општини Шид.
У рубрики Култура и просвита зазначена схадзку УО Завода за културу войводянских Руснацох на хторей розподзелєни буджет конкурсу за традицийну и сучасну творчосц. У истей рубрики представени Славомир Олеяр и Любомир Медєши, лауреати НВУ „Руске слово”.
На бокох Людзе, роки, живот представени васкуларни хирурґ и професор Славко Будински з Нового Саду, родом з Руского Керестура.
Будинок Уметнїцкей колониї у Бачкей Тополї ма нову манифестацию „Юлий у лиловим”. Вецей на тоту тему и пестованю лаванди, на бокох Дружтва.
У рубрики Духовни живот напис о преславеним швету Яна у церкви Успения Пресвятей Богородици у Коцуре. У грекокатолїцкей парохиї св. Йосафата у Кули дзеци прияли першу Св. причасц.
На бокох Спорту пише о Турниру у малим фодбалу хтори ше вечарами отримує у Руским Керестуре.
З Интермецом предлужени написи о наших музичарох.
У тим чишлє додатки Руснаци и швет и Мозаїк.