ЖДИНЯ (ПОЛЬСКА) – Каждого року Обєднанє Лемкох у Польскей орґанизує стретнуце Лемкох з Европи и других континентох. Того року отрима ше уж 41. стретнуце на ватровим полю у Ждинї.
Як информує Орґанизацийни комитет фестивалу, того року „Лемковска ватра” у Ждинї будзе од 14–16. юлия.
Орґанизаторе поволали на фестивал до Ждинї и партнерску орґанизацию – Союз Руснацох Українцох Сербиї, а у програми фестивалу предвидзени наступ и аматерских колективох Руснацох и Українцох зоз Сербиї.
Того року на тим фестивалу зоз Сербиї наступи дует шпивачох Славко Микитишин и Филип Пронек зоз КУД „Иван Сенюк” зоз Кули.
Под час фестивалу у Ждинї будзе отримане и Предсидательство СФУЛО, першираз после вибору нового предсидателя Марка Гованского.
Попри учашнїкох фестивала у Ждинї будзе пребувац и делеґация Союзу Руснацох Українцох Сербиї на чолє зоз його предсидательом Боґданом Виславским, єдним зоз подпредсидательох СФУЛО.