НОВИ САД – Тих дньох видруковани репринт кнїжки Мирона Будинския „Воденїчка на стриберним потоку”, чийо ориґиналне виданє вишло 1970. року. У кнїжки зачувани авторски вираз, алє є збогацена зоз илустрациями Лари Петкович, авторовей унуки.
НВУ „Руске слово” средства за видаванє тей кнїжки достала прейґ проєкту „Култура=кнїжка=природа – интеркултурални роботнї за дзеци” при Буджетским фонду за национални меншини Министерства за людски и меншински права и дружтвени диялоґ Републики Сербиї. Прето, попри кнїжки, обявена и роботна тека у хторей три приповедки преложени на сербски язик, а илустрациї мож вифарбйовац.
Кнїжка „Воденїчка на стриберним потоку” ма коло 200 боки и груби рамики, предава ше ю вєдно зоз роботну теку. Кнїжка будзе представена школяром у Руским Керестуре, Коцуре и Дюрдьове.
Тото богате виданє кошта 1.000 динари (на попусту будзе коштац 700), а кнїжку мож купиц у представительствох НВУ „Руске слово” – у Новим Садзе на адреси: Футожска 2, ІІІ поверх (од 9 по 14 годзин) телефон 021/6613-697. У Руским Керестуре у будинку дакедишнєй Друкарнї на II поверху и на телефон 025/51-00383 або 025/703-311 (од 9 по 14 годзин), як и прейґ колпортерох по наших местох.
Тиж так, тоту, як и други кнїжки „Руского слова” годно наручиц и прейґ сайту https://knjizkiporuski.com.