БАЧИНЦИ – З нагоди Националного швета Руснацох, вчера, 18. януара у малей сали Дома култури отримана пригодна програма.
Державну гимну „Боже правде“ и шветочну шпиванку Руснацох „Браца Русини“ одшпивали вєдно шпивацки ґрупи КПД „Драґутин Драґен Колєсар” зоз Бачинцох и КПД „Дюра Киш“ зоз Шиду у провадзеню оркестра дружтва зоз Шиду.
Професор Зденко Лазор представел историйни подїї вязани за присельованє Руснацох на простори Войводини и Сриму як и институциї хтори значни за Руснацох и отримованє їх идентитету.
Шпивацка ґрупа ше представела зоз венчиком руских народних шпиванкох, а школярка другей класи Музичней школи „Филип Вишнїч“ у Шидзе Анастасия Антич Дуйкович зоз Бачинцох одграла на гушлї композицию „Пасушок“, Зденко Лазор пречитал писню „Селїдби“.
На концу шпивацка ґрупа одшпивала познату народну шпиванку „Дай нам Боже добри час“.
Програму провадзели парох у Шидзе и декан сримски о. Михайло Режак, домашнї парох о. Юлиян Рац хтори и шпивач у шпивацкей ґрупи, членїца Националного совиту Руснацох Наташа Еделински Миколка як и госци зоз Шиду, Бикичу и Беркасова, а потим ше шицки дружели на коктелу, шпивали и танцовали.
