Єднаки права супружнїкох зоз заєднїцким маєтком, од вчера нїзши такси

автор ртв
1.1k Опатрене

БЕОҐРАД – Малженски и звонкамалженски супружнїки котри ше уписую як власнїки заєднїцкей нєрухомосци, од вчера, 9. януара, буду препознати як окремна катеґория хасновательох услугох катастру, преноши Танюґ информацию з Републичного ґеодетского заводу (РҐЗ).

Супружнїки котри вєдно купую нєрухомосц и чийо ше обидва мена находза у купопредавацким контракту, свойо права на нєрухомосц годни уписац по найнїзшей такси, хтора 300 динари.

– Супружнїки ше и дотераз могли вєдно уписац як власнїки на нєрухомосци, алє нє були препознати як окремна катеґория хасновательох услугох катастру, та плацели полну суму такси од 9 807, односно 8 671 динар – поведзене у РҐЗ.

– Часто ше збува же супружнїки вєдно одплацую рати кредиту, алє ше у купопредавацким контракту находзи лєм супругово мено, та ше лєм вон уписує до катастру як власнїк нєрухомосци. Власнїцтво супруги над маєтком у катастру оставало нєвидлїве, а тиж и єй права – гварене у РҐЗ и наглашене же ше з уписованьом обидвоїх супружнїкох до катастру нєрухомосцох змоцнює и жени и малженску заєднїцу.

Нови услуги часц Нового правилнїка о знїжених таксох, хтори вчера ступел на моц, а по хторим буду туньши 14 услуги Служби за катастер нєрухомосцох. Од 25 до 50 одсто туньши такси за дзелєнє, лєбо зєдиньованє парцелох, та за вибудов, лєбо добудов обєктох, а такса за контрак о доживотним витримованю тераз половку менша и виноши 3 000 динари.

ПОВЯЗАНИ ТЕКСТИ