РУСКИ КЕРЕСТУР – После контроли компетентного Надпатраюцого орґану спред Општини Кула Райка Баланджича, єдна часц вискладаних дражкох з бехатоном у центру валалу ознова прескладана, понеже ше указали розлики у нивелациї терену.
Гоч урядово нєдавно закончена реконструкция керестурского парку у центру, штварток 9. авґуста, майстрове котри складали бехатон коцки ше врацели на терен, та оправяли дражки дзе Надпатраюци орґан замерковал нєдостатки.
Прескладана цала дражка з боку улїци Маршала Тита, и менши часци коло ресторану и централней дражки ґу памятнїку. Оправянє реґулованє зоз контрактом помедзи Општину Кула и виводзачом, цо значи же то нє дополнююци трошки за финансиєра, алє же шицко идзе на терху виводзача.
Як нєурядово Рутенпрес дознава на терену, нєточносци при виробку замерковани на часцох дзе виводзач роботох „Екоґрадня” зоз Зренянину, анґажовал подвиводзача зоз Шабцу.
