Сербия ма проевропску владу, котру потримує Европска уния. Векшина гражданох Сербиї потримує владу. Векшина гражданох ше проциви Европскей униї. Дзе ту лоґика?
На Балкану нє треба глєдац лоґику. На Балкану нїхто нє постава политичар прето же би робел за других, за народ або державу. Политичаре дзбаю, насампредз, о себе и своїх. Виберачом даваю лєм тельо кельо потребне же би достали їх гласи. А у Сербиї глас барз тунї. У политики нє треба глєдац щиросц. Як и на пияцу, главни циль – цо туньше купиц и цо драгше предац. Отже – заробиц на наївних и нєуких.
Предсидатель и влада на словох нєдвосмислово опредзелєни за членство у Униї. Лидере европских жемох хваля таке опредзелєнє беоґрадскей власци и позитивно оценюю єй дїялносц. Людзе котри гласаю за владаюцу партию морща ше на шицко европске, окрем високого стандарда. Прецо, вец, гласаю за тоту партию? Пре єй прешлосц, пре єй дакедишню политику. Вибераче прешвечени же предсидатель, премиєрка и їх сотруднїки думаю так як и вони: же у глави остали радикали, лєм то нє шму явно повесц, и же прилапюю европску политику прето же муша, бо лєм так можу видайкац од Европи финансийну и другу потримовку.
Виберач трима же Европа наївна и же ю треба спревесц: бешедовац єдно, а робиц друге. Кед є у иножемстве, вон ше справує европски: вредно роби, нє плюва по драже, нє биє дзеци, нє паркує авто там дзе забранєне… Кед ше враци до Сербиї, нє трима ше шора и закона, бо зна же вони ту нє важа. Ту мож руцац шмеце дзе сцеш, мож направиц ресторан на явней поверхносци, мож нє плациц порцию, мож штреляц на свадзби, мож куриц дзе ше кому кури…
Нє меняц ше и нїч нє меняц у держави, а буц прияти до заєднїци европских жемох – того нє було и нє будзе. З нєшкайшима шпиталями, судами, драгами, гайзибанами, комуналнима услугами, з нєшкайшим уровньом людских правох и шлєбодох, з нєшкайшим уровньом пристойносци у парламенту и на явней сцени вообще, Сербия нє муши анї шнїц же 2021. року постанє член Европскей униї. А праве тот рок политичаре часто споминаю.
На концу конца, власц найбаржей потримую два телевизиї з националну фреквенцию котри найотворенше одруцаю и ґажа европски вредносци. З такима и з тима цо велїчаю Ратка Младича нє мож будовац здраве дружтво. Европска уния ма строги условия за нових членох, а применює и начало з писнї Йована Йовановича Змая „Качур и жаби”: – Нє по словох, алє по дїлох познаю ше людзе.
Становиска висловени у тим тексту виключно авторово и нє вше одражую ушорйовацку политику новинох „Руске слово”.