Будзенє шлїдуюцей ґенерациї

автор иван канюх
904 Опатрене

По конєц рока требали би буц отримани виберанки за нови зволаня националних совитох меншинских заєднїцох у Републики Сербиї. На нїх годни участвовац лєм особи уписани до Окремного виберацкого списку (ОВС). Зоз добродзечним уписованьом до ньго, у рамикох нашей рускей заєднїци достава ше єдно зоз основних гражданских правох котре нам ґарантує Устав. То право виберац и буц вибрани на виберанкох за Национални совит Руснацох, цо представя перши крочай у дальшим и векшим активизме у рускей заєднїци. 

Прецо то важне за младих, то питанє котре Роботне цело за младеж Националного совиту Руснацох од 2015. року, односно одкеди є у тим зволаню, жадало приблїжиц нашей младежи. Зоз власного искуства можем повесц же перше цо младим придзе на розум кед слово о тей теми то поняце: „политика” за котру, нажаль, вяжу рижни неґативни прикмети. Праве прето зме од самого початку своїх активносцох интензивно робели зоз младима же бизме им потолковали же „политика” нє вше вязана за поняца котри им перши приду на розум.

Приоритет нам бул указац им же у наших институцийох, яки ґод да су, єст людзох котри им жадаю помогнуц, котри ту праве пре нїх, а нє обратно, и прецо важне отримац таких людзох у наших институцийох у часох котри пред нами. Тиж так, нєпреривно зме их на рижни способи одшмельовали же би писали проєкти и толковали им же то орудиє зоз котрим, попри тим же нє буду приходзиц до ситуацийох же зоз своєй кишенки муша виплациц даяку активносц котру жадаю орґанизовац, можу наисце порушац и пременїц дацо у своїм месце и окруженю.

З оглядом на тото же кажда ґенерация младих ма свой окремни способ комуникованя, одлучели зме зоз младима витвориц єден нєформални и особни контакт у представяню важносци уписованя до ОВС-у, алє и самей улоги и значносци Националного совиту и Роботного цела за младеж. Прето зме по наших местох, насампредз у Руским Керестуре, Коцуре, Новим Садзе и Дюрдьове орґанизовали роботнї и презентациї дзе млади мали нагоду директно нам поставиц питаня и дознац цо их интересує, або дознац тото цо по тераз нє знали.

Гоч сом приємно нєсподзивани зоз заинтересованосцу младих за тоти теми, источашнє сом и нєприємно нєсподзивани же и попри скоро 20 рокох иснованя Националного совиту як нашей найзначнєйшей институциї, уровень информованосци наших людзох о його инґеренцийох, капацитетох, можлївосцох и значносци за нашу заєднїцу барз нїзки. Же би ше таки стан пременєл, Роботне цело за младеж ше намага за собу охабиц и єден тирваци шлїд, та зме и тот остатнї рок нашого мандату пошвецели упознаваню младежи зоз нашима институциями и їх уключованьом до истих, бо так можу будовац драгу до витворйованя своїх идейох и дац свойо векше доприношенє у креированю будучносци рускей заєднїци.

Праве прето, у сотруднїцтве зоз телевизийну Редакцию програми на руским язику Радио-телевизиї Войводини, робиме на правеню промотивного видео знїмка котри шицким заинтересованим за уписованє до ОВС-у, значи и младим и старшим, укаже хто, дзе, кеди и як ше може уписац и витвориц тото свойо гражданске право. До знїманя того видео знїмку зме уключели и младих звонка нашого Роботного цела котри потераз мали и нє мали нагоду упознац ше зоз нашу роботу, понеже то проєкт котри праве ма задаток прешириц идею активизма насампредз при младих. З оглядом на тото же млади нєшка од найвчаснєйших рокох живота поставаю диґитално писмени, промотивни видео знїмок на котрим тераз робиме праве задумани же би ше го промововало на дружтвених мрежох и интернету прето же на тот способ кажде ма можлївосц гоч кеди и гоч дзе достац информациї котри му потребни. Тиж так, понеже жиєме у чаше швидких медийох и информацийох, мерковали зме и на тото же би видео у цо кратшим чаше през слику и звук на креативни и едукативни способ представел заинтересованим шицко цо треба же би знали.

Вшелїяк же активизем гоч якей файти мож водзиц и звонка институцийох и гоч якей финансийней потримовки и витвориц красни резултати. Медзитим, за пременки и активносци котри жадаме витвориц на єдним висшим уровню мушиме роздумовац и активовац ше тиж на єдним висшим уровню.

Попри розвиваня особних знаньох, искуствох, познанствох и приятельствох, розвиванє активизма при нашей младежи може буц барз добра одскочна деска у їх уключованю до велїх других орґанизацийох и здруженьох звонка нашей заєднїци, з оглядом на факт же велї нашо млади пре дальше школованє одходза до векших местох дзе у рамикох векшей заєднїци можу пренайсц рижни други места за витворйованє своїх интересованьох. За нас у Роботним целу уж велька побида же зме зоз нашу самостойну роботу младих мотивовали же би за початок отверали и поставяли питаня, алє и сами пробовали дойсц до одредзених информацийох котри их интересую, а дотикаю ше шицких нас.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ