КОЦУР – Традицийну манифестацию Дзецински тидзень, котру ше того року отримує под мотом „Же би дзеци щешлївши були: любов, почитованє, а нє сила!”, означую и дзеци у Основней школи „Братство єдинство” у Коцуре.
За кажди дзень през Дзецински тидзень професоре и професорки класней и предметней настави у Основней школи обдумали рижни образовни, креативни, спортски, гуманитарни и дружтвени активносци за школярох нїзших и висших класох, з уключованьом родичох, наставнїкох и локалней заєднїци.
Школяре нїзших класох могли участвовац на подобовим конкурсу „Почитуй, люб и помогнї”, а нащивели и валалску Библиотеку, Ґеронтолоґийни центер, як и Етно клуб „Одняте од забуца”. Участвовали и у креативней роботнї „Древо любови и почитованя”, рижних дружтвених и креативних бавискох, а окремна часц програми будзе и полиґон схопносци з родичами „Бавме ше вєдно”.
Школяре висших класох през тот тидзень участвую у спортских активносцох, фодбалским турниру, одбойки, як и у математичних и других квизох, креативних и подобових роботньох, прекладательних и читательних роботньох. Вирабяю хижки за птички, а Парняцки парламент у Дзецинским тижню реализує активносци „Питай ше парняцкому тиму”, „Табла подзековносци”, „Ланєц добрих дїлох” и други.
По словох компетентних коцурскей Школи, циль шицких активносцох то розвиванє любови, почитованя, емпатиї, солидарносци, сотруднїцтва и нєнасилного справованя, як и творенє порушуюцей и сиґурней атмосфери у школи.
