НАШО МЕСТА – По нових предписаньох, од стреди, 1. марца, оверйованє подписох, рукописох, преписох (рижних документох) у компетенциї новтарушох у городох и општинох за чийо подруча су вибрани, так же тоту роботу вецей нє можу окончовац у општинских/городских управох (месних канцеларийох) и у судох.
Медзитим, у городох и општинох дзе нєт новтаруша, спомнути роботи и надалєй окончую основни суди, судски єдинки, приємни канцелариї основних судох, як и општински управи.
У Вербаше меновани єден явни новтаруш, у Шидзе тиж єден, у Новим Садзе єст 10 новтарушох, у Суботици три, у Сримскей Митровици два, а у Бачкей Тополї єден.
Новтаруше ище не меновани за кулску и жабельску општину, так же у Кули оверйованє подписох, рукописох, преписох предлужує суд и Општинска управа, односно єй єдинки по местох – месни канцелариї (з тим и Месна канцелария у Керестуре).
У Жаблю тоти роботи мож покончиц у Приємней канцелариї и у Општинскей управи, та месних канцеларийох.
Медзитим, як то було и дотераз, то ше одноши лєм на „обичне” оверйованє подписох, а нє и за нєрухомосци, заложни вияви, за терхованя нєрухомосцох, знїманє терхованя, так же пре тоти роботи жителє кулскей општини муша пойсц до новтаруша до Вербасу, лєбо Србобрану, а жителє жабельскей општини до Нового Саду.
У Сербиї тераз єст 162-ох новтарушох, алє и далєй 12 подруча основних судох нє маю новтаруша. За спомнуту роботу овласценя маю и заняти у канцелариї новтаруша – новтарушовово помоцнїки, так же будзе вецей особи за оверйованє подписох.
На сайту Министерства правди обявена таблїчка городох и општинох у хторих суди и општински управи предлужую оверйованє докуметнох и подписох, понеже у нїх нєт новтаруша.