Добра идея лєм початок роботи

автор анита ґовля
897 Опатрене

Сиґурно сце нє раз чули у медийох и у каждодньовим живоце же ше спомина проєкти. Хто их финансовал, хто их реализовал, хто их потримал… А поставя ше питанє, цо то вообще проєкт? Цо то предклад проєкту? Як го написац? Кому писац, як пренайсц донаторох?

Шицки тоти питаня барз значни за писанє проєктох, алє тиж значне и будзе барз хасновите такой розбиц дзепоєдни предпрешвеченя коло их писаня и витворйованя. Насампредз: Же донаторе лєдво чекаю праве нам дац финансийну потримовку − то нє так, реалносц цалком иншака, глєданє финансийней потримовки представя активни процес, нє можеме пасивно чекац же нам дахто лєм так понукнє пенєжи бо „ми маме идею”. Кед достанєме пенєжи, можеме их трошиц як сцеме – донаторе нам нє даваю пенєжи на дарунок. Подписує ше контракт зоз орґанизациями хтори витворели критериюми донатора и у контракту точно пише на хтори способ ше будзе средства преуруцовац на ваш рахунок, средства мож трошиц лєм у складзе зоз буджетом, проєкта, кеди и як подношице финансийни и наративни звит, яки рахунки ше подноши… Цо вецей пенєжи глєдаме, вецей нам даю – донатор прилапює лєм буджети хтори реално поставени у складзе зоз активносцами. Векши финансийни средства, у векшини случайох, доставаю орґанизациї хтори уж маю за собу вельке искуство у витворйованю проєктох. Менши и нови орґанизациї би требали почац зоз меншим буджетом и на єдноставнєйших конкурсох. З часом, кед орґанизация змоцнї, може ше конкуровац и на векши конкурси. Кед раз достанєме финансийну потримовку од донатора, вше ю будземе доставац – то ше у пракси барз ридко случує. У проєкту значне донатором указац же вони нє єдини потримую наш проєкт и же ше на тот способ проєкт годно предлужицц и кед прейдзе їх потримовка. Приоритети донаторох ше з часом меняю и нє добре ше опрец лєм на єдного донатора. Кед будземе спреведац же зробиме вецей як цо зме годни витвориц, маме векши шанси при донаторох – пракса указує же ше на тот способ траци довириє донаторох, годно ше случиц же мушице врациц финансийни средства цо нє добре за репутацию и будуцу роботу вашей орґанизациї. Нашо цилї мушиме цалком прилагодзиц донаторови – свойо цилї и интереси найлєпше так прилагодзиц же би и нам, алє и донаторови, одвитовали.

Кажди проєкт почина зоз идею, або зоз жаданьом, же би ше дацо пременєло на лєпше и позитивнєйше. Медзитим, идея нє представя проєкт. Же би постала проєкт, мушиме мац ясну слику цо жадаме витвориц и як то реализовац. Намаганє за даяку пременку у самей наменки проєкта, а намира же бизме дацо поробели по тим питаню ше поставя у форми циля проєкта.

Кед бизме сцели буц цалком прецизни, могли бизме повесц же проєкт представя лоґично и хронолоґийно ушорени активносци хтори зоз своїм запоровадзаньом приводза до витворйованя циля хтори пред тим дефиновани, у предвидзеним часовим термину, зоз анґажованьом одредзених людских, материялних и финансийних ресурсох.

Предклад проєкта ше пише при конкурованю же би ше достало финансийну потримовку же би ше витворело проєкт и найчастейше подрозюмює: Описованє ситуациї, односно проблема хтори потребне ришиц, або злєпшац зоз реализацию проєкта, Общи и специфични цилї проєкта, Активносци и їх часови розпорядок, Обчековани резултати, Плановани буджет. Гоч ше форма предкладу проєкта часто розликує од донатора до донатора,  тоти аспекти вше у його составе.

Єден зоз найзначнєйших крочайох у писаню проєкта то глєданє донатора хтори би го потримал. Потенцийни донаторе найчастейше отвераю конкурс за финансованє проєктох дзе на ясни способ дефиновани проблеми зоз хторима ше сцу занїмац и можлїви ришеня, резултати хтори ше обчекує зоз їх финансийну потримовку и обсяг финансийних средствох хтори вони порихтани дац по проєкту. Же бисце нашли потенцийних донаторох, треба себе дац часу, а найлєпше може послужиц интернет.

Кед зме пренашли донаторох и скорей як почнєме писац предклад проєкта, мушиме нашу идею розробиц и дац одвит на питанє же цо ми наисце жадаме зоз тоту идею у рамикох проєкта? Же би идея постала проєкт добре би було дац одвити на тоти питаня: Цо сцеме злєпшац?  – чом думаме же тото потребне, цо проблем на хтори сцеме уплївовац, чом тот проблем настал, яка причина. Яки пременки бизме сцели посцигнуц? – цо бизме сцели видзиц як резултат нашей роботи, у хторим периодзе, у яким обсягу. Цо точно будземе робиц? – хтори то активносци буду на проєкту, яки задатки будземе витворйовац. Як будземе знац же ше пременки случели? – на хтори способ оценїме чи зме добре витворели проєкт, цо бизме могли злєпшац. Кельо кошта виводзенє шицких наших активносцох? – чи можлїве пренайсц финансийни средства за таки проєкт, дзе бизме могли глєдац средства и як утвердзиц цо нам трошки.

Кед маме пред собу тоти одвити, можеме почац писац предклад проєкту. Єст рижни формати, апликациї и напрямки за рижни конкурси, медзитим, шицки предклади проєктох маю одредзени елементи хтори им заєднїцки: Насловни бок, Вокраци о проєкту, Место и тирванє, Описованє проблема, Общи и специфични цилї, Индикатори, Цильна ґрупа и хаснователє, Резултати, Партнере, План активносцох, Буджет. Кажди тот елемент значни и треба го добре обдумац же бизме познєйше нє мали бриґи. Наприклад, даєдну  активносц зме нє положели до буджету. Ми тоту активносц мушиме витвориц, гоч нє маме финансиї у буджету проєкта, бо зме ю наведли як часц проєкту. Теди мушиме дац свой пенєж.

На концу барз значне повесц же:

Гоч кельо тренинґи, семинари, обуки и подобне о проєктох сце прешли, найзначнєйша пракса и искуство, як и у каждей роботи. Найчежше написац перши проєкт, алє после идзе лєгчейше. Нє треба ше бац, кед дацо нє знаце треба ше дакому опитац хто вам може помогнуц.Вельо квалитетнєйше ше роби у тиму. Єдна особа нє може шицко, алє вєдно у тиму вше мож вецей и лєпше. Треба себе дац часу и престудирац конкурс. Кед ше нашвидко пише, дацо вихабице. Статистики гуторя же лєм 10 по 30 одсто написаних проєктох преходза при донаторови, алє то нє значи же треба одуставац. Треба буц упарти бо ше лєм так збера праксу и рейтинґ при донаторох.

И тото цо найзначнєйше, треба мац дзеку писац и буц позитивни, мац на розуме же ми то можеме поробиц. Кед будземе оптимисти и кед себе прешвечиме же „можеме и сцеме”, и донатор будзе баржей вериц до наших схопносцох.

Щешлїво!

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ