СЕРБИЯ – Трошительни цени у Сербиї у януаре 2017. року за 1,4 одсто були векши як у децембру прешлого, а за 2,4 одсто векши як у януаре 2016. року, сообщел Републични завод за статистику, а преноши „Дневник”.
У одношеню на 2015. рок, трошительни цени з хторима ше мера инфлацию у 2016. року штреднє звекшани за 1,2 одсто.
У януаре того року подрагшела пожива и безалкоголни напой за 3,1; алкоголни напой и доган за 2,9; транспорт за 1,6; комуникациї за 0,5; рекреация и култура за 0,4 и здравство за 0,3 одсто.
За 0,2 одсто драгши квартелїни, вода, струя, ґаз и други горива, услуги у ресторанох и гортелох и образованє, а туньше облєчїво и шмати, за 1,1 одсто.
Ґувернерка Народней банки Сербиї Йорґованка Табакович штредком того тижня виявела же влонї медзирочна инфлация була 1,6 одсто.