БЕОҐРАД – Од 1. юния ше почнє применьовац нови Закон о защити и борби процив насилства у фамелиї, по хторим шицким котри вдеря жену – шлїдзи кара гарешту, наявели министер нукашнїх дїлох Небойша Стефанович и министерка правди Нела Кубурович.
У нащиви Безпечней хижи у Беоґрадзе министри гварели же з роботу на терену, креированьом нового закона и активносцох полициї, тужительства и судох, жадаю поробиц шицко цо можлїве же би насилства престали.
Як гварела министерка Кубурович, почали и обуки за 400 полицайох и вецей як 400 заменїкох тужительох и судийох, а у рамикох обуки буду отримани и роботнї з нєвладовима орґанизациями, дзе им буду приблїжени ситуациї з хторима ше зочую жертви насилства у фамелиї.