РУСКИ КЕРЕСТУР – Пред и на вчерайши Дзень женох, центер Руского Керестура бул пестри од рижнородного живого квеца, та других прикраскох и сувенирох, хтори Керестурци куповали своїм найблїзшим з нагоди 8. марца.
Попри пригодних програмох у дзецинскей заградки, 8. марец традицийно означени и у Клубу пензионерох, дзе жени вчера вечар привитали Янка и Наду Лендєрових з Вербасу. Янко присутним виведол монодраму „Илия опозиция” Дюру Папгаргая, а у своєй режиї и сценоґрафиї.
Публика з уживаньом и шмихом провадзела представу, а госцох привитал и представел координатор Клубу пензионерох Желько Ковач.
Преславу свойого швета жени предлужели у дружтвованю з музику и почасценьом, а членїци Клубу достали и пригодни дарунки у рамикох покраїнскей акциї „Жена жени”, хтори им уручели Весна Макаї и Светлана Гарди.